5-araw na bakunahan sa PITX, arangkada na
MANILA, Philippines — Aarangkada na simula ngayong Lunes, Enero 24, ang limang araw na mobile COVID-19 vaccination drive na isasagawa ng Department of Transportation (DOTr) at Metro Manila Development Authority (MMDA) sa Parañaque Integrated Terminal Exchange (PITX) para sa mga pasahero at mga transport workers.
Ayon kay DOTr Secretary Arthur Tugade, ang naturang vaccination drive ay isasagawa mula alas-8:00 ng umaga hanggang alas-12:00 ng tanghali.
Magtatagal ito sa loob ng limang araw o hanggang sa Enero 28, 2022, Biyernes.
Sinabi ni Tugade na ang programa na tinatawag na “We Vax as One: Mobile Vaccination Drive,” ay naglalayong magbigay ng AstraZeneca vaccine brand bilang first, second, o booster doses.
Aniya, bibigyang prayoridad sa programa ang mga tatanggap ng booster shots at target nilang makapagbigay ng 500 bakuna kada araw.
Pinapayuhan ng DOTr ang mga nais magpabakuna na magtungo sa Gate 4 sa ikalawang palapag ng PITX. Tatanggap din ng walk-ins sa vaccination drive, at magkakaroon ng registration sa lugar.
- Latest
