Parañaque at Pasay balik COVID-19 high-risk
MANILA, Philippines — Muling inilagay ng Department of Health (DOH) sa ‘high-risk classification’ ang mga lungsod ng Parañaque at Pasay dahil sa malaking pagtaas sa mga bagong kaso ng COVID-19 at mataas din na ‘average daily attack rate (ADAR)’.
Sinabi ni DOH Epidemiology Bureau Director Dr. Alethea De Guzman na tatlong siyudad ang nakitaan ng positibong growth rate ng mga bagong kaso mula Mayo 30 hanggang Hunyo 12: ang Parañaque (2% growth rate), Pasay (19%) at Malabon (30%).
Sa kabila na pinakamataas ang Malabon, naitala naman ang ADAR ng Parañaque City sa 9.09 kaso kada 100,000 populasyon na higit na mataas sa hangganan na 7 cases per 100,000. Naitala rin ang ‘intensive care unit (ICU) utilization’ ng siyudad sa 62.5%.
Sa Pasay City naman, nasa safe zone ang utilization rate ng mga pagamutan at ICU ngunit nasa high risk category sila sa kanilang ADAR na 8.65 kaso kada 100,000 populasyon.
Natukoy rin na nasa ‘critical risk’ ang ICU utilization sa mga lungsod ng San Juan (100%), Makati (72.4%), Las Pinas (90%) at Muntinlupa (70.4%).
“Ito’y senyales na kailangang dagdagan ang ating detection, testing, at i-review kung gaano ka-efficient ang contact tracing at isolation natin,” panawagan pa ni De Guzman.
- Latest
