Amo, sinaksak ng helper na tinanggal sa trabaho

MANILA, Philippines — Sinaksak ng isang truck helper ang kanyang dating amo matapos siyang tanggalin sa trabaho sa Brgy. Concepcion Uno, Marikina City, kamakalawa ng hapon.

Nakatakas ang suspek na nakilala lang na si Dennis Espino, habang sugatan at nilalapatan na ng lunas sa Saint Vincent Hospital ang kanyang dating among si George Monteverde, 37, residente ng naturang barangay.

Batay sa ulat ng Marikina City Police, dakong alas-5:15 ng hapon nang maganap ang krimen, sa Saint Jude St., Saint Claire 3, Brgy. Concepcion Uno.

Kasalukuyan umanong nakaupo ang biktima sa driver’s seat ng kanilang delivery truck, na nakaparada sa naturang lugar, nang bigla na lang dumating si Espino, at kaagad siyang tinarakan sa likod bago tumakas.

Ayon sa pulisya, paghihiganti ang posibleng dahilan ng pananaksak ng suspek sa biktima. Dati umanong nagtatrabaho sa biktima ang suspect na tinanggal dahil sa hindi magandang performance nito sa trabaho.

Tinutugis na ng mga awtoridad ang suspek para ikulong at kasuhan sa piskalya.