5 bus terminal, isinara ng MMDA
MANILA, Philippines — Ipinasara kahapon ng Metropolitan Manila Development Authority (MMDA) ang limang bus company terminals dahil sa paglabag sa nose-in, nose-out policy at iba pang violation.
Ang closure operation ay pinangunahan ni MMDA Chairman Danilo Lim, na isinagawa alas-3:30 ng hapon.
Ang mga bus company na ipinasara ang kanilang mga terminal ay ang DLTB Co, Lucena Lines Inc., 2 terminal ng Raymond Bus, na matatagpuan sa Southbond EDSA sa Cubao, Quezon City at Superlines, na matatagpuan naman sa Northbound.
Ayon kay MMDA Operation Supervisor Bong Nebrija, noong nakaraang taon ay ipinasara na aniya ang nasabing mga bus terminals dahil hindi sila nakapag-comply sa mga itinakdang requirements ng MMDA.
Tulad ng terminal permit, paglabag sa nose-in, nose-out policy at iba pang violation.
Subalit, nakiusap aniya ang naturang mga kompanya, na muli silang payagang makapag-operate sa pangakong susunod sa itinakdang terminal requirements ng ahensiya.
Sinabi pa na Nebrija, na binigyan pa nila ng panahon para makapagsumite ng requirements ang mga bus company subalit ang tumugon lamang aniya ay ang Genesis Bus Terminal.
Nang muli nilang balikan ang naturang mga bus terminal ay hindi pa rin tumutugon ang mga ito sa itinakdang requirements ng MMDA kaya kahapon ay tuluyan na itong ipinasara.
- Latest
