Marcos: Pagkatao ng Bamban Mayor, imbestigahan!
MANILA, Philippines — Pinaiimbestigahan na ni Pangulong Ferdinand Marcos Jr. ang pagkatao ni Bamban, Tarlac Mayor Alice Guo.
Sa ambush interview sa Cagayan de Oro City, sinabi ng Pangulo na matagal nang iniimbestigahan si Guo.
Kaya anya nahuli ito ay dahil ni-raid ang Bamban at nakita ang mga dokumento na kinukwestyon ngayon at kung talagang totoo ang mga ito at paano siya nakatakbo ng mayor.
Sinabi pa ng Pangulo na kakilala niya ang lahat ng mga politiko sa Tarlac at maging sila ay hindi kilala ang Alkalde at kung saan siya galing.
“Kaya kailangan talagang imbestigahan. So, kasabay ng sa Bureau of Immigration, pati siguro may magku-kwestyon ng taga citizenship. ‘Yun lahat i-imbestigahan natin ‘yan kasama ang imbestigasyon, hearing na ginagawa ng Senado,” pahayag pa ni Pangulong Marcos.
Ayon pa kay PBBM, nagtataka sila kung saan nanggaling si Guo kaya hindi nila isinasantabi ang posiblidad na peligroso sa seguridad ang ganitong pangyayari.
Kaya naman tiniyak ni Pang. Marcos na magbabantay na mabuti ang pamahalaan para hindi na maulit na may nakakapasok sa bansa na mga kaduda-dudang tao
Si Guo ay pinaghihinalaan na espiya ng China sa PIlipinas.
- Latest