CHED chief kinasuhan sa Ombudsman

MANILA, Philippines — Nahaharap si Commission on Higher Education (CHED) Chairman Prospero “Popoy” de Vera sa samut-saring kasong kriminal sa Office of the Ombudsman kaugnay ng hindi umano na-account na P10.3 bil­yong pondo na nakalaan sa libreng tuition at living allowance ng mga iskolar ng gobyerno sa ilalim ng Republic Act (RA) 10931 o ang Universal Access to Quality Tertiary Education Act.

Ang reklamo ay inihain ni Agapito Lubaton, Admi­nistrator at Chief Executive Officer ng Marvelous College of Technology na matatagpuan sa Koronadal City, isa sa mga pribadong Higher Educational Institutions (HEIs) na inawtorisa na tumanggap ng mga scholar ng pamahalaan kaugnay ng kawalan ng state university o kolehiyo sa isang lugar.

Sa affidavit-complaint na inihain noong Marso 12, 2024, kinasuhan ni Lubaton ang CHED Chief dahilan umano sa kapabayaan sa tungkulin nito bilang isang public official o paglabag sa Republic Act (RA) 11032 o ang Ease of Doing Business Law, grave abuse of power and authority, moral injury para sa mga umaasang karapat-dapat na estudyante at mga edukasyonal na institusyon at non-payment sa living allowances sa mga grantees/student scholars.

Sa ilalim ng Unified Student Financial Assistance System for Tertiary Education (UniFAST) program, ang mga iskolar ay pinagkakalooban ng P30,000 kada semestre para sa kanilang tuition fee at living allowance. Ang CHED ay may mandatong i-remit ang nasabing halaga sa mga kinauukulang eskuwelahan.

Inihayag pa ni Lubaton na ang implementasyon sa UniFAST ay naging maayos naman sa mga unang taon ng programa pero ang problema ay nangyari sa school year  (SY) 2021-2022 and 2022-2023 matapos mabigo ang CHED Chief na i-remit ang law-mandated funding para sa mga estudyanteng scholars.

“Chairman De Vera had only paid and given the tuition fee in the amount of P10,000 for SY 2021-2022 but the P20,000 living allowances of students per semester for about two years now has not been paid up to the present,” ayon pa kay Lubaton.