DOJ: Extradition request mula US para kay Quiboloy ‘di pa natatanggap

MANILA, Philippines — Wala pa umanong natatanggap na anumang extradition request ang pamahalaan mula sa Estados Unidos para sa ekstradisyon ni Kingdom of Jesus Christ (KOJC) leader, Pastor Apollo Quiboloy.

Ayon kay Justice Secretary Jesus Crispin Remulla, hanggang sa ngayon ay naghihintay pa rin sila ng kahilingan mula sa pamahalaan ng Estados Unidos.

“We are awaiting the request of the US government on this matter and it has to pass through a lot of channels also within the US government,” aniya.

Dagdag pa ng kalihim, kasalukuyan pa ring ­nirerebyu ng DOJ ang mga kasong rape at cyberlibel na kinakaharap ni Quiboloy sa bansa at ito ang prayoridad nila sa ngayon.

Hindi pa rin naman aniya naglalabas ang Bureau of Immigration (BI) ng anumang Immigration Lookout Bulletin Order (ILBO) laban sa pastor.

“Wala pa. Kasi wala pa sa amin ang preliminary report. There was an initial letter but it will take more than a letter for us to issue an order,” ani Remulla.

Matatandaang si Quiboloy ay kasama sa Most Wanted List ng Federal Bureau of Investigation (FBI), dahil sa kinakaharap nitong mga kaso ng sex at labor trafficking sa Estados Unidos. c