MANILA, Philippines — Nakapagtala ang Department of Health ng 8,463 bagong infection ng coronavirus disease, Biyernes, kung kaya't nasa 1.58 milyon na sumatutal ang nahahawaan nito sa bansa.
Batay sa mga bagong nakalap na datos ng Kagawaran ng Kalusugan, narito ang bagong mga pasok na datos para araw na ito:
- Lahat ng kaso: 1,580,824
- Nagpapagaling pa: 61,920, o 3.9% ng total infections
- Kagagaling lang: 2,854, dahilan para maging 1,491,182 na lahat ng gumagaling
- Kamamatay lang: 145, na siyang nag-aakyat sa total local death toll sa 27,722
ECQ 3.0 sa Metro Manila
-
Ngayong araw naitala ang pinakamaraming bagong kaso ng COVID-19 sa Pilipinas (8,463) sa nakaraang 64 araw. Huling mas marami ang new infections noong ika-28 ng Mayo.
-
Sa ikatlong pagkakataon, ilalagay uli sa pinakamahigpit na enhanced community quarantine sa Metro Manila simula ika-6 hanggang ika-20 ng Agosto dahil sa lumalaking banta ng mas nakahahawang Delta variant ng COVID-19.
-
Kaugnay pa rin ng pag-iingat ng Pilipinas laban sa Delta variant, palalawigin naman ng bansa ang ipinatutupad na travel ban sa 10 bansa hanggang ika-15 ng Agosto, gaya na lang ng India, Pakistan at Nepal.
-
Dahil sa ipatutupad na lockdowns sa Kamaynilaan sa susunod na linggo, nananawagan naman ngayon ang Kilusang Mayo Uno (KMU) na itaas sa P5,000 ang kasalukuyang P1,000 ayuda na ibinibigay ng gobyerno sa mga nakatira sa ECQ areas. Aniya, malaki kasi ang magiging epekto sa kawalan ng trabaho.
-
Nadagdagan naman ng 1.5 milyong doses pa ng COVID-19 vaccine ng kumpanyang Sinovac ang suplay ng bakuna ng Pilipinas, matapos nitong lumapag sa Ninoy Aquino International Airport kaninang 7:30 a.m.
-
Umabot na sa 195.88 milyon ang tinatamaan ng COVID-19 sa buong daigdig, ayon sa huling datos ng World Health Organization. Sa bilang na 'yan, patay na ang 4.18 milyong katao.
— James Relativo