Gobyerno bibili ng COVID-19 booster shots sa Moderna

MANILA, Philippines — Pinag-aaralan ng gobyerno na bumili ng COVID-19 vaccine booster shots na ginagawa ng Moderna.

Sa joint hearing ng House Committees on Health at Trade and Industry, sinabi ni Vaccine Czar Carlito Galvez Jr. na ang dini-develop na booster ng Moderna ay pwedeng gamitin kahit saang bakuna.

“We found out that Moderna is developing a booster. ‘Yung booster na ‘yun, puwedeng gamitin kahit na Sinovac o kahit na Gamaleya ang ating nauna,” paliwanag ni Galvez.

Sabi pa ni Galvez na balak nila na ang 5 million doses na bahagi dapat ng bibilhing bakuna sa Moderna ay gagawin na lang booster.

“Our plan is we might just to buy booster shots instead of 5 million vaccine doses,” ayon kay Galvez na nilinaw rin na ang naturang mga booster shots ay karagdagan sa 20 milyong nakareserbang vaccine shots.

Maaaring dumating ang booster shots sa Set-yembre o Oktubre sa 2021.

Nabatid na isinara na ng gobyerno ang supply deal ng Pilipinas sa Moderna para bumili ng 20M doses kung saan 7M dito ay pinondohan ng private sector at 13M ay sa national government vaccination program.