Mga tagasunod ni Quiboloy pinadidisarmahan din
MANILA, Philippines — Pinasisiguro ni Senador Risa Hontiveros sa Philippine National Police( PNP) na maging ang armas ng mga miyembro ni Kingdom of Jesus Christ (KOJC) leader Apollo Quiboloy ay kumpiskahin.
Kasabay nito nagpasalamat naman si Hontiveros sa PNP dahil sa pag-revoke sa lisensya ng mga armas ni Quiboloy.
“Salamat sa agarang pagtugon ng PNP sa panawagan kong tanggal-lisensya sa armas ni Quiboloy. I commend PNP Chief Rommel Marbil for heeding this call”, ayon sa Senadora.
Subalit giit ni Hontiveros, dapat pa rin tiyakin ng PNP na walang mga armas niya ang maiwan sa mga miyembro ni Quiboloy.
Dapat lang anya na mabuwag na ang private army ng lider na todo-balandra rin ng kanilang mga baril sa social media.
Umaasa naman si Hontiveros na maaresto na si Quiboloy sa lalong madaling panahon lalo pa patuloy umano nitong niyuyurakan ang ating institusyon.
Patunay anya dito ang paglalabas ni Quiboloy kamakailan ng audio recording kung saan nagbigay pa siya ng bugtong tungkol sa location niya.
“Matapos nilang pagdiskitahan ang Senado bilang institusyon, ngayon naman, ang ating kapulisan ang iniinsulto. Hindi tayo papayag na pagmukhain niya tayong tanga,” giit pa ni Hontiveros.
- Latest
