Botohan sa poll protest ni Bongbong ipinagpaliban
MANILA, Philippines – Ipinagpaliban kahapon at sa halip ay itinakda sa Oktubre 15 ng Supreme Court na tumatayong Presidential Electoral Tribunal ang botohan sa election protest ni dating Senador Ferdinand “Bongbong” Marcos Jr. laban kay Vice President Leni Robredo.
Noong nakaraang linggo, ipinagpaliban din ng PET ang aksyon sa report ni Associate Justice Alfredo Benjamin Caguioa sa poll protest ni Marcos.
Si Caguioa ang member-in-charge sa kaso.
Isinumite ni Caguiao noong Setyembre 9 ang kanyang report sa resulta ng recount sa tatlong pilot province ni Marcos na kinabibilangan ng Iloilo, Negros Oriental at Camarines Sur pero hindi pa rin ito napagbobotohan ng Mataas na Hukuman.
Ang resulta ng recount sa mga boto sa naturang mga lalawigan sa halalan noong 2016 ay magtutukoy kung ididismis o hindi ang protesta ni Marcos. Kapag hindi nabasura, palalawigin ng PET ang coverage ng recount sa 24 na lalawigan at lunsod na sumasaklaw sa 30,000 election precinct.
Isinampa ni Marcos noong Hunyo 2016 ang electoral protest para kuwestiyunin ang pagkapanalo ni Robredo na nakalamang ng 260,000 boto sa halalan sa pagkabise-presidente.
- Latest
