Dalagitang binalatan positibong ginahasa, binuhusan ng asido
MANILA, Philippines — Kumpirmadong ginahasa muna at binuhusan pa ng asido bago pinatay ang 16-anyos na dalagitang si Christine Lee Silawan sa Lapu-Lapu City sa Cebu noong nakaraang buwan.
Ayon kay Dr. Erwin Erfe, hepe ng forensic team ng Public Attorney’s Office (PAO), sa isinagawa nilang awtopsiya ay nakitaan nila ng senyales ng mga galos at hematoma sa pribadong parte ng katawan si Silawan, na palatandaan na ginahasa ito.
Lumabas din aniya sa awtopsiya na sinunog ang mukha ni Silawan gamit ang sulfuric acid.
Isinagawa ang awtopsiya sa bangkay ng biktima isang araw bago inilibing noong Marso 23.
Sabi ni PAO Chief Persida Acosta, posibleng may kasama o hindi nag-iisa ang taong nasa likod ng brutal na pagpatay kay Silawan.
Si Silawan ay natagpuang patay, walang suot pang-ibaba, binalatan ang mukha, kinuha ang ilang internal organ nito sa isang bakanteng lote sa Barangay Bankal, Lapu-Lapu City noong Marso 11.
Nagpaalam lamang sa kanyang ina noong Marso 10, dakong alas-4:00 ng hapon na magsisimba ang estudyante ngunit hindi na nakauwi pa ng kanilang bahay, hanggang sa matagpuan itong bangkay.
Ang dating nobyo ni Silawan, na isang menor de edad, ang itinuturong posibleng may kagagawan ng krimen, dahil kinatagpo umano ito ng dalagita bago ito natagpuang patay.
Una ng inihayag ng PNP Region 7 Crime Laboratory na hindi ginahasa si Silawan.
- Latest