Ebidensya para hatulang guilty si Jinggoy sa plunder 'sapat' — Ombudsman

MANILA, Philippines — Inudyok ng Office of the Ombudsman ang Sandiganbayan na huwag payagang maghain si dating Sen. Jinggoy Estrada ng demurrer to evidence sa kasong pandarambong na inirereklamo sa kanya kaugnay ng kanyang diumano'y kinalaman sa pork barrel scam.

Isinapubliko ang court pleading nitong Lunes.

Sa 11-pahinang opposition paper na inihain sa Fifth Division kamakailan, nanindigan ang Office of the Special Prosecutor ng ombudsman na sapat na ebidensya ang bank inquiry report ng Anti-Money Laundering Council para hatulang nagkasala si Estrada.

Sa kanilang 90-pahinang inquiry report tungkol sa financial at bank transactions ni Estrada, sinabi ng AMLC na may mga palatandaan na nakatanggap ang dating senador ng P157.6 milyong "kickback" mula kay Janet Lim-Napoles mula 2007 hanggang 2012.

“In view of the sufficiency of prosecution evidence, there exist no room for leave to be granted accused Estrada in order for him to file demurrer to evidence,” wika ng mga prosecutor.

Isinumite naman para sa resolution ng kampo ni Estrada ang kanyang motion for leave of court to file demurrer to evidence para sa resolution kahapon matapos matanggap ng korte ang opposition paper, ayon sa Fifth Division Office ng Clerk of Court.

Kadalasang isinasagawa ang paghahain ng demurrer to evidence para maibasura ang kaso sa kalagitnaan sa paglilitis.

Pinapayagan ng demurrer ang akusado na huwag nang magpakita ng counter-exhibits at hamunin na lamang ang kasapatan ng ebidensya ng prosekusyon.

Inihain ng ombudsman noong Hunyo 2014, nagmula ang plunder case ni Estrada sa kanyang diumano'y pagkamal ng P183.793 milyong kickback matapos igugol ang kanyang Priority Development Assistance Fund mula 2004 hanggang 2012 sa mga pekeng non-government organizations na pinagmamay-arian daw ng itinuturong utak ng PDAF scam na si Janet Lim-Napoles.

Makailang beses nang itinanggi ni Estrada na nagkaroon siya ng transaksyon kay Napoles pagdating sa kanyang PDAF.

Kasalukuyang tumatakbo si Estrada sa pagkasenador para sa 2019 midterm elections at ine-endorso ng partidong Hugpong ng Pagbabago ni presidential daughter Sara Duterte.