Aguirre pinaiimbestigahan sa NBI ang dengue vaccine ‘health scam’

MANILA, Philippines — Inatasan ni Justice Secretary Vitaliano Aguirre II ngayong Lunes ang National Bureau of Investigation na imbestigahan ang kontrobersyal na P3.5-bilyon dengue vaccine project ng Department of Health na kalauna’y nalamang may masamang epekto sa mga nabakunahan nito.

Nais malaman ni Aguirre kung may dapat managot mula sa gobyerno at sa pharmaceutical firm Sanofi sa tila pagmamadaling pagpapatupad ng 2016 Dengvaxia deal.

Nilagdaan ng kalihim ang Department Order 763 kung saan “immediately” ang pagpapatupad ng kautusan.

Inamin ng Sanofi nitong nakaraang buwan na ang mga nabakunahan na hindi pa nagkakaroon ng dengue ay maaaring makaranas ng mas malalang sakit.

Nagsimula ang dengue vaccination program noong Abril 2016 sa ilalim ng noo’y Health Secretary Janette Garin.

Binansagang “shameless public health scam” ni Presidential spokesman Harry Roque ang naturang programa.

Sinabi naman ni Garin sa GMA News na dumaan ang programa sa guidelines ng World Health Organization.