3 suspek na nakapataysa 17-anyos, timbog
MANILA, Philippines — Arestado ang tatlong suspek na umano’y responsable sa pamamaril at pagpatay sa isang 17-anyos na binatilyo noong Nobyembre 14 ng gabi sa Makati City.
Kinilala ng hepe ng Makati City Police na si Police Sr. Supt. Gerry Umayao ang mga suspek na sina JR Talangan Cocjin , alyas “Nonoy Pating”, 21; John Patrick Baterna Orias, alyas “Jon-Jon”, 20, at Jonathan Lelis Cervano, 24.
Ayon kay Umayao, ang nabanggit na mga suspek ang may kinalaman umano sa pamamaril at pagpatay sa 17-anyos na biktimang si Maynard Allan Manalo noong Nobyembre 14 ng taong kasalukuyan, alas-6:45 ng gabi sa Upper Azucena St., Brgy. Pembo, Makati City.
Sa follow-up operation ng mga kagawad ng Makati City Police, alas-5:00 kamakalawa ng umaga nadakip sina Cocjin at Orias sa panulukan ng Amarillo at Dafodil Sts., Brgy. Rizal, samantalang si Cervano ay nadakip naman ng ala-1:00 kahapon ng madaling araw sa Pascua St., ng nabanggit pa ring barangay.
Ayon pa kay Umayao, inamin umano sa kanya ng mga suspek, na ang biktima at grupo nito ay kakompitensiya aniya nila sa iligal na operasyon ng panghoholdap at snatching.
Kung saan sinabi ng mga suspek, na nitong nakalipas na buwan sila rin aniya ang responsable sa panghoholdap sa isang convenience store sa Guadalupe, Makati City.
Ang nadakip na mga suspek ay pawang nahaharap sa kasong Murder at Illegal Possession of Fire Arms and Ammunition, na kahapon ay sumailalim na ang mga ito sa inquest proceeding.
- Latest
