Maguwang ang nakapusil

CEBU, Philippines — Maguwang nga nag-edad og 21-anyos ang gitumbok nga aksidenteng nakapusil sa 14-anyos nga tinun-an, samtang ang manag-amahan nilang silingan misuway og tabon sa krimen maong gidakop sila sa kapolisan.

Kini maoy gibutyag nga mga impormasyon sa kapolisan mahitungod sa kamatayon sa 14-anyos nga batang napusilan patay samtang nag-module suds a ilang balay sa V.H Garces, Barangay Consojong, siyudad sa Talisay sa miaging semana.

Ang silingang lalaki ug anak niining dalaga  matud pa nagmugna og estorya ug nihatag og sayop nga impormasyon ngadto sa kapulisan sa Talisay City Police Station sigon pa sa Police Regional Office (PRO)-7.

Kini maoy rason giaresto sila sa kapulisan kay matud ni Police Lieutenant Colonel Gerard Ace Pelare dili tinuod ang mga impormasyong gihatag sa duha nga adunay nisulod tawo sa balay sa biktima ug namusil.

Maguwang ang suspek

Matud pa kapolisan, igsuon ra sa biktima ang nakapusil kaniya, apan gitago ug namakak ang mga giaresto.

Nadiskubrehan sa kapulisan nga namakak ang duha tungod sa kuha sa CCTV  nga adunay audio recording kung giunsa nila pagplano ang pagtabon sa krimen. Ang footage naa na karon sa Regional Anti-Cybercrime Unit-7.

“Accordingly, these are close acquaintances, mga silingan aning victim ug suspect nga nakahibalo sa nahitabo then when the incident happened ning adto sila sa balay niya they were like orchestrating kung how to cover the crime but our investigators were able to discover what they have done because naay CCTV, naa say audio recording which now forwarded to our anti-cybercrime unit for processing,” sigon ni Pelare.

Gumikan sa gibuhat sa duha gipasakaan sila og kasong obstruction of justice ug accessory to the crime of homicide.

Gipasakaan sab og kasong illegal possession of firearms ang tagiya sa armas nga mao ang maguwang sa biktima. Ang armas nga rebolber gibalahan og .9mm narekober na ug gituohang maoy gigamit sa krimen.

Padayon pang gisuta sa kapulisan kung nganong naay armas ang suspek apan nahibaw-an nila nga nalambigit kini illegal nga drugas kaniadto.

Si PLt. Col. Epream Paguyod, ang hepe sa Talisay City Police Station ilang gidakop ang manag-amahang silingan sa biktima ug suspek, tungod sa ilang pagtabon sa krimen.  Gani giingong sila sab maoy nitago sa armas nga nakapatay sa biktima.

Nasuta sab nga ang gipangita nga maguwang sa biktima giingong ubos kini sa probation sa kasong may kalabutan sa illegal nga drugas.

Aksidente ra

Ang inahan sa namatay nibutyag nga wala tuyoa nga pusilon anak niyang lalaki ang manghod niini, matud niya aksidente ang tanan.

Matud pa, gikan nag-module ang bata ug motupad unta og higda sa lantay diin naghigda ang maguwang niini, apan sa pagsibog sa naulahi aksidenteng nibuto ang armas.

Nanawagan karon ang inahan sa anak nga motahan sa iyang kaugalingon para atubangon ang sala niini sa iyang igsuon.

Ang rehiyonal nga direktor sa Department of Education Central Visayas Salustiano Jimenez, nitug-an nimando na siya karon sa pagsusi ug paghatag sa tanang tabang ngadto sa pamilya sa biktima.

Si Jimenez nipaabot sa iyang pahasubo ngadto sa pamilya sa namatay kinsa nihulagway nga aduna pa unta kaayoy taas nga pangandoy sa kinabuhi.

Ang rehiyonal nga director nanawagan karon sa mga ginikanan nga kanunay gayud magmonitor sa kahimtang sa ilang mga kabataan. — Decemay Padilla (BANAT NEWS)