Batangas ambush: 5 utas

MANILA, Philippines — Limang katao ang nasawi sa magkakahiwalay na pananambang sa bayan ng Tuy at Tanauan City, Batangas kamakalawa ng hapon.

Sa ulat, bandang alas-4:30 ng hapon nang pagbabarilin ang tatlong biktima na sina Roger Cupo; Julian de Castro; at Mando Marasigan sa Brgy. Bolbok, Tuy, Batangas at pawang dead on arrival sa ospital.

Ang mga biktima ay lulan ng Kawasaki tricycle na bumabagtas sa lugar at pauwi sa kanilang tahanan nang paulanan ng bala ng mga armadong lalaki na sakay ng kulay puting van.

Ang ikalawang insidente ng pamamaril ay naganap dakong alas-4:50 ng hapon nang pagbabarilin ang tatlong biktima sa Brgy. Sambat, Tanauan City na ikinasawi nina Rhandel Rivera, nagtamo ng tama ng bala sa ulo at Robemar Perez.

Nilalapatan ng lunas sa pagamutan ang isa nilang kasamang babae na nakilalang si Rona Perez.