Yee iniwan ang Farm Fresh, tumawid sa Zus Coffee
MANILA, Philippines — Mula sa paggabay sa Farm Fresh ay lilipat si multi-titled high school at college coach Jerry Yee sa Strong Group Athletics para sa darating na 2024 Premier Volleyball League Reinforced Conference.
Ang SGA, sister team ng Farm Fresh ay tatawaging Zus Coffee sa nasabing komperensya na nakatakda sa Hulyo.
Kasabay ng paglipat ni Yee sa Zus Coffee ay ipaparada naman ng Foxies ang isang all-Japanese staff na pamumunuan ni head coach Hideo Suzuki.
Dadalhin ni Yee sa Zus Coffee sina St. Benilde Lady Blazers stars Cloanne Mondoñedo, Michelle Gamit, Gayle Pascual at Jade Gentapa na nauna nang naglaro sa Farm Fresh sa 2023 PVL Invitational Conference.
Walang naipanalo ang Athletics sa 11 nilang laro sa 2024 PVL All-Filipino Conference na muling pinagreynahan ng Creamline at may tsansang makuha ang top pick sa kauna-unahang PVL Rookie Draft sa Hulyo 6.
Bukod sa rookie draft ay magkakaroon din ang PVL ng draft lottery sa Hunyo 24 kung saan may 40 percent na tsansa ang Zus Coffee (SGA) na mahugot ang first pick kasunod ang Capital1 (30%), Galeries Tower (20%) at Farm Fresh (10%).
Bago ang PVL Rookie Draft ay magdaraos muna ng two-day Draft Combine sa Hunyo 25-26 kung saan sasalang ang lahat ng aplikante sa physical measures, medical tests, interviews, athletic tests at scrimmages.
- Latest
