Isa na lang sa Mavs
OKLAHOMA CITY — Kumolekta si Luka Doncic ng 31 points, 11 assists at 10 rebounds para sa kanyang ikaanim na career playoff triple-double sa 104-92 panalo ng Dallas Mavericks sa Thunder sa Game Five at kunin ang 3-2 lead sa Western Conference semifinal series.
Nakabangon ang Dallas mula sa 96-100 kabiguan sa Game Four para lumapit sa pagsibak sa Oklahoma City sa Game Six na kanilang pamamahalaan sa Linggo.
Humataw si Derrick Jones Jr. ng playoff career-high 19 points at nagtala si P.J. Washington Jr. ng 10 points at 10 rebounds para sa Mavericks.
Binanderahan ni Shai Gilgeous-Alexander ang Thunder sa kanyang 30 points.
Sa Boston, humakot si Jayson Tatum ng 25 points at 10 rebounds sa 113-98 pagsibak sa Cleveland Cavaliers sa Game Five papasok sa Eastern Conference finals.
Tinapos ng Boston ang kanilang semifinals series ng Cleveland sa 4-1 para umabante sa ikatlong sunod na conference finals at labanan ang mananaig sa semis duel ng New York Knicks at Indiana Pacers.
Angat ang Knicks sa Pacers, 3-2.
Kumolekta si Al Horford ng 22 points, 15 rebounds at 5 assists para sa Celtics.
- Latest