Lady Knights tinuhog ang 4-0 record
MANILA, Philippines — Patuloy ang pamamayagpag ng Letran matapos tuhugin ang Jose Rizal University, 25-16, 25-19, 25-19, sa NCAA Season 99 women’s volleyball tournament kahapon sa Filoil EcoOil Arena sa San Juan City.
Nagtulungan sa opensa sina power-hitting duo Marie Judiel Nitura at Gia Maquilang matapos ilista ang 16 at 15 points, ayon sa pagkakasunod, para sa Lady Knights.
Inilista ng tropa ang ikaapat na sunod na panalo at saluhan sa tuktok ng team standings ang defending champions St. Benilde Lady Blazers.
Para kay Letran coach Oliver Almadro, alam niyang habang tumatagal ay patindi nang patindi ang makakalaban nila kaya kailangan nilang maghanda.
“I’m really happy nandito kami ngayon, but the job is not yet done and the NCAA is still far from over,” ani Almadro. “I guess nakabuwelo lang ng konti but we have to continue working hard and we need to seek to improve.”
Dahil sa panalo ay lumalakas ang kanilang kumpiyansa sa pagharap sa Lady Blazers.
“We have to taper our expectations dahil palakas ng palakas kalaban, dito kami mate-test,” dagdag nito.
Kumana si Karyla Rafaela Jasareno ng walong puntos para sa Lady Bombers na may 1-4 baraha.
- Latest