Williams, Tiongson hataw sa Terrafirma
MANILA, Philippines — Putol ang kuryente ng Meralco sa Terrafirma, 96-88, sa likod nina Jordan Williams at Juami Tiongson sa umaatikabong aksyon ng 2022-2023 PBA Governors’ Cup kagabi sa Ynares Sports Center sa Antipolo.
Nagpaulan ng 30 puntos si Tiongson sa likod ng anim na tres dagdag pa ang 3 rebounds at 3 assists habang may 29 markers ang pambatong reinforcement na si Williams para sa unang panalo ng Dyip.
Matinding follow-up ito ni Williams para sa 1-1 baraha ng Terrafirma matapos mauwi sa wala ang 46-point debut sa 115-130 kabiguan kontra sa Converge subalit kinailangan ng tulong ng locals sa pangunguna ni Tiongson.
Kumambyo din ng 13-point, 10-rebounds si Eric Camson habang may kumpletong 8 puntos, 7 assists, 2 rebounds at 2 steals ang kapitang si Alex Cabagnot.
“Of course, I don’t take any credit for myself because it’s always about the team. The team really exclusively looked for me when I was making my shots early. We would have not done without everyone. It’s a total collective effort,” ani Tiongson.
Trinangkuhan ni Tiongson ang pagharurot ng Dyip sa fourth quarter kung saan bumalandra sila sa biglang 86-69 lead para sa pinakamalaki nilang kalamangan matapos ang dikit lang na 72-65 abante pagkatapos ng third period.
Kumasa ang Bolts sa 84-90 sa huling minuto subalit kinulang sa oras upang maiwasan ang silat na pagkatalo sa kabila ng perpektong rekord.
Hindi sumapat ang halimaw na 29 puntos at 19 rebounds ni KJ McDaniels bukod pa ang 4 assists, 2 steals at 2 tapal para sa Meralco na naunang kinaldag ang Rain or Shine, 105-87, at Northport, 107-102.
- Latest
