Ancajas-Ioka fight ipinagpaliban dahil sa Omicron

MANILA, Philippines — Hindi muna matutuloy ang dream fight ni reigning International Boxing Federation (IBF) junior bantamweight champion Jerwin Ancajas kontra kay World Boxing Organization (WBO) junior bantamweight king Kazuto Ioka.

Ito ay matapos maglabas ng travel ban ang Japanese government sa lahat ng foreign visitors dahil sa bagong variant ng coronavirus disease (COVID-19) na Omicron.

Handang-handa pa naman sana ang Team Ancajas na bumiyahe sa Disyembre 11 para sa Ancajas-Ioka blockbuster unification fight sa Dis­yembre 31 sa Ota City General Gymnasium sa Tokyo.

Wala pang pormal na inihahayag ang kampo nina Ancajas at Ioka kung kailan gaganapin ang laban.

Posibleng sa unang bahagi ng 2022 na lamang ito idaos.

Excited na sana si Ancajas na makaharap si Ioka dahil matagal na itong pangarap ng Pinoy pug.

Ngunit wala itong magawa kundi ang sumunod sa mga regulasyong ipinatutupad.

“Kung para naman sa ikabubuti ng lahat, sobrang nauunawan ko naman dahil hindi biro ang CO­VID-19 lalo na yung bagong v­ariant,” ani Ancajas.

Ito rin ang naging pananaw ni MP Promotions chief Sean Gibbons na mas maigi nang ligtas ang lahat bago isipin ang boksing.

“We are looking forward to this historic fight against Ioka but understands there are bigger concerns than boxing in Japan and the world with the situation caused by the emergence of the latest variant,” ani Gibbons.

Handa naman si Gibbons na gawin ang lahat upang maikasa ito sa susunod na taon.