Walang makatatalo sa -pagiging loyal ng mga Lebanese

Kung loyalty ang pag-uusapan, ang mga Lebanese o mamamayan ng bansang Lebanon sa Middle East ang isa sa mga masasabing tapat sa kani-kanilang grupo o pamilya. Ang pinakamahalaga sa kanila ay ang dignidad at pangalan ng kanilang angkan. Hindi lang kasi sarili nilang pangalan ang kanilang pinangangalagaan kundi pati nga ang sa pamilya hanggang sa grupo na kanilang kinaaaniban.

Itinuturing nilang res­ponsibilidad ang pag-aalaga ng pangalan at reputasyon ng kanilang pamilya o grupo. Gagawin nila ang lahat para maisalba ang reputasyon ng kanilang pamilya at sariling dignidad.

Dahil din sa respeto nila sa kani-kanilang mga pamilya o grupo, iniiwasan nila ang mamahiya ng tao sa publiko. Kung gaano nila ingatan ang kanilang pangalan ay ganoon din nila iniingatan ang sa iba. Makikita rin ito sa kanilang pagpayag sa mga pabor ng kaibigan para lamang maisalba ang dignidad nito kahit alam naman nilang hindi nila gagawin ang kahilingan ng kaibigan.

Ganito katatag ang samahan ng mga Lebanese. Hinding-hindi rin sila nang-iindyan at nang-iiwan sa ere kung may ‘di kagandahang kaganapan. Kumbaga ipagtatanggol nila ang kanilang pamilya o kaanib sa grupo kahit ano pa ang mangyari.