Unom ka buwan nga pagtimbang sa katakos ni Garcia

Milingkod na si Cebu City acting mayor Raymond Alvin Garcia sa iyang katungdanan hulip ni suspended Mayor Mike Rama sulod sa unom ka buwan nga maghatag kaniya og kahigayonan nga pamatud-an ang iyang katakos isip amahan sa dakbayan bisan pa man sa kahamubo sa panahon kay ang unom ka buwan dali ra kaayo mokilab apan kong maayo ang iyang agi mahinumduman gyud kini sa katawhan.

Dili na kini bag-o pa alang ni Garcia kay sige na siya og hulip sa katungdanan ni Rama sa panahon nga molarga kini sa laing nasud, apan labing dugay usa ka buwan. Apan karon mora’g makapanukad na siya sa paghimo sa kaugalinon niyang programa.

Mamahimo man nga iyang ipadayon ang kasamtangan nga programa sa Rama administration ilabi na kadtong nasugdan ug kaposlan sa mga tawo apan pwede pud nga mohimo siya sa kaugalingon niyang diskarte nga maangkon gyud niya nga tatak Garcia.

Hilabihan ra ba ka judgemental ang mga tawo karon. Dili malikayan nga makomparar si acting mayor Garcia kang suspended Mayor Rama. Naa ra kaniya kong magpabilin siya sa anino ni Rama o motipas kay mohimo sa iyang estilo sa pagpanerbisyo.

Kong kasinatian dili makwestyon, sa katakos duna usay ikabuga si Garcia ug sa kautokan aw dili pud mabintahaan kay abogado man busa capable gyud siya nga modumala sa dakbayan nga dili na magsalig sa iyang gipulihan.

Posible nga kining nahitabo ang sinugdanan sa pag-aslom na sa relasyon sa acting mayor ug sa suspended mayor kay posibleng dili na sundon sa kasamtangan nga administrasyon ang programa sa iyang gisundan apan kong sa tan-aw niya nga walay kaposlanan kining programa ayaw pagduha duha ayaw kini buhata.

Ang unom ka buwan ang himoong sukdanan sa mga tawo kong unsa nga klase si Raymond Garcia sa pagdala dakbayan kong makapasar siya dako og purohan nga padayon na siya sa iyang katungdanan sama sa iyang amahan nga si kanhi Mayor Alvin Garcia.

Sa bahin ni Rama, ang unom ka buwan mamahimo niyang gamiton sa sayo nga pagpangampanya apan sa kaugalingon na niyang paningkamot ug wala nay magamit nga resources sa dakbayan.

Ang importante nga mamintinar niya ang iyang presensya ngadto sa mga Sugboanon nga nagbutang kaniya sa pwesto.

Kong nagpabilin nga intact ang pagsalig sa mga tawo ngadto kaniya tungod sa iyang nahimo sa syudad dili gyud siya matarog ug maapektohan ug mogawas gihapon siyang mananaug sa iyang mga hagit nga iyang nahiaguman.

Sa pagkakaron wala pa gyuy kasegurohan ang tanan alang ni Rama human sa unom ka buwan, makabalik pa ba kaha siya sa katungdanan. Atong atangan.