Pagduda sa Ombudsman
Labihan na kaubos ang pagtan-aw sa publiko sa atong sistema sa hustisya nga imbes pasidunggan ang Ombudsman sa pagtagad dayon sa kaso batok ni Cebu City Mayor Mike Rama gidudahan na hinuon nga nagpagamit sa mga politiko sa pagpahamtang dayon sa unom ka buwan nga preventive suspension.
Napasaka ang kaso sa Pebrero. Nasuspenso si Rama sa Mayo. Naabtan ang Ombudsman og duha ka buwan pag-atiman sa reklamo sa upat ka kawani sa City Hall nga wa suweldohi sud na sa 10 ka buwan. Paspas kon ikumparar sa naandan sa Ombudsman.
* * *
Di makiangayon ang pasangil sa pamolitika sa kadinalian sa panginahanglan paghatag sa gihikaw nga mga suholan. Gani, mao gyoy giuna pagtrabaho ni Acting Mayor Raymond Garcia sa iyang pagpuli ni Rama.
Pero gidudahang gigamit lang sa mga kaatbang ni Rama. Nga dunay laing ilang rason sa paghipos niya. Natsambahan lang ang kaso, nga nipresentar sa kahigayonan nga aksyonan dayon aron sa pagbaraw sa pangabuso sa City Hall, nga nahimong labing sayon nga kahimanan sa pagpatuman sa ilang plano, nga di sila direktang kapasanginlan nga maoy nagpasiugda sa maniobra.
* * *
Dunay laing kaso sa City Hall nga mas unang napasaka pero hangtod karon wa tagda sa Ombudsman: Disyembre 2022 pa napasaka sa National Bureau of Investigation (NBI) ang kasong plunder nga nanukad sa P383.5 milyones nga kontrata sa basura atol sa administrasyon ni anhing Mayor Edgar Labella.
Ambot tsamba ba lang nga pipila sa mga sinumbong sa kasong plunder maoy nag-piyesta sa pagka-suspenso ni Rama, pipila nila mahimo ganing makabalik sa City Hall.
* * *
Ang lusot sa Ombudsman nga di dayon maatiman ang mga kaso kay nihit ang ilang budget ug kuwang og graft investigators. Pero lisod gihapong ipasabot nganong sa usa ka bahin dunay mga kaso nga siyam-siyaman samtang, sa pikas bahin, may mga kaso nga paspas pa sa alas-4.
Si Ombudsman Samuel Martires, nga tinudlo ni kanhi Presidente Rodrigo Duterte, gidudahang dasig mo-imbestigar sa mga tinudlo ni Presidente Ferdinand Marcos Jr. pero luya sa mga tinudlo sa kanhi administrasyon. Nga sukwahi sa pagduda nga gipa-suspenso sa Malakanyang si Rama tungod sa pagtambong sa rally ni Duterte sa Cebu City niadtong Pebrero.
* * *
- Latest
