SMB lalapit sa sweep vs Rain or Shine

MANILA, Philippines — Ang paglapit sa series sweep ang hangad ng San Miguel, habang mag-aagawan sa 2-1 lead ang Barangay Ginebra at Meralco sa Season 48 PBA Philippine Cup semifinal round.

Sasagupain ng Beermen ang Rain or Shine Elasto Painters ngayong alas-4:30 ng hapon kasunod ang salpukan ng Gin Kings at Bolts sa alas-7:30 ng gabi sa kani-kanilang best-of-seven semifinals duel sa Dasmariñas Arena sa Cavite.

Dinalawahan ng San Miguel ang Rain or Shine sa Game One, 101-98, at sa Game Two, 106-89, para lumapit sa PBA record na ika-45 finals appearance target ang pang-30 korona.

“As of now, two wins is nothing. We have to get four. There’s nothing to celebrate about,” sabi ni Beermen coach Jorge Gallent sa kanilang 2-0 lead sa Elasto Painters.

“This is our third step. First was the eliminations, second one was the quarterfinals, and this is the third. But it’s not over yet. We have to get to four to finish this step,” dagdag nito.

Samantala, 23 three-point shots pa ang kaila­ngan ni SMB shooter Marcio Lassiter, may 1,219 triples ngayon, para makatabla kay legendary Allan Caidic (1,242) sa No. 2 spot sa PBA all-time list.

Nananatili sa No. 1 si Jimmy Alapag (1,250).

Sa ikalawang laro, pag­lalabanan ng Ginebra at Meralco ang 2-1 bentahe sa kanilang serye matapos magtabla sa 1-1.

Kinuha ng Gin Kings ang Game One, 92-88, bago nakatabla ang Bolts sa Game Two, 103-91.

Sa nasabing kabiguan sa Meralco sa Game Two ay bumanat si Christian Standhardinger ng career-high 41 points para sa Ginebra.