PVL magdaraos ng Rookie draft

MANILA, Philippines — Kagaya ng National Bas­ketball Association (NBA), magkakaroon din ang Premier Volleyball Lea­gue (PVL) ng isang rookie draft na idaraos sa Hulyo.

Gagawin ang nasabing drafting sa pamamagitan ng lottery na mapapanood sa telebisyon at via strea­ming, ayon kay PVL Commissioner Sherwin Malonzo.

Ang pagsasagawa ng drafting ang pipigil sa kinaugaliang direktang paghugot ng mga koponan ng mga collegiate players.

Sa pagiging kam­peon ng katatapos lamang na 2024 PVL All-Filipino Confe­rence ay ang Creamline ang pinakahuling pipili ng rookie.

Ang kulelat na Strong Group Athletics ang maghihirang sa No. 1 overall pick kasunod ang Capital1 Solar Energy, Galeries Tower at Farm Fresh na tumapos sa 11th, 10th at ninth place, ayon sa pagkakasunod.

Ang Athletics, Solar Spikers, Highrisers at Fo­xies ang tanging kasali sa lottery habang ang fifth pick ay awtomatikong mapupunta sa No. 8 Nxled Chameleons.

Ang sixth pick ay mapapasakamay ng No. 7 Akari Chargers habang ang seventh at eighth picks ay ibibigay sa No. 6 Cignal HD Spikers at No. 5 PLDT High Speed Hitters, ayon sa pagkakasunod.

Ang huling apat na picks sa first round ay makukuha ng No. 4 Chery Tiggo Crossovers, No. 3 Petro Gazz Angels, No. 2 Choco Mucho Flying Titans at No. 1 Cool Smashers.