Mga lungsod sa Camotes nakadawat og P12 milyones sa Kapitolyo

CEBU, Philippines — Nikabat ngadto sa P12 milyones ang subsidy nga nahatag sa Kapitolyo sa gipahigayong Suroy-Suroy sa Sugbo ngadto sa mga mayor sa Camotes Group of Islands nga gilangkuban sa Pilar, San Francisco, Tudela ug Poro kinsa nag-host sa “Enchanted 1 Camotes” escapade.

Kini maoy gipahibawo ni Cebu Provincial Governor Gwendolyn Garcia atol sa iyang closing speech kagahapon didto sa Lungsod sa Poro, ang kataposang stopover sa duha ka adlaw nga excursion.

Sa iyang pakigpulong, si Garcia nipadayag sa iyang kalipay sa pagtapos sa aktibedades ug matud niini nagduso kanila sa paghatag sa maong financial assistance nga alang sa imprastraktura.

Ang matag mayor sa nahisgutang mga lungsod nakadawat og tag P3 milyones gikan sa Kapitolyo.

Ang 2nd Day sa Suroy-Suroy sa Sugbo unang nihunong sa Barangay Villahermosa, Marine Sanctuary ug Katunggan Mangrove Forest sa Lungsod sa Tudela.

Atol sa paghunong, gipadayag ni Barangay Kagawad George Imperial III ang ilang tinguha nga himuong eco-park ang lugar.

Matud ni Imperial nga usa ka protected area ang maong site tungod sa presensiya sa nagkadaiyang aquatic resources sama sa giant clams, “takubo” ug uban pa diin nagpakita og biodiversity.

Gibutyag ni Imperial nga dihang gisusi niadtong tuig 2018, ang barangay maoy nakadaog sa1st place isip lugar nga adunay pinakadaghang biodiversity sa fifth class local governments.

Gipakita usab ni Imperial ang presensiya sa mangrove forest nga maoy nakasagang sa mga kalamidad diha sa ilang lugar.  “Mao nga kada tuig mogahin mi og panahon sa pagpananom og mga mangrove”, padayag ni Imperial.

Sa pagkakaron, nagpadayon pa ang proseso niini sa paghimo sa lugar nga eco-park.  Dugang ni Imperial nga malaumon sila nga pinaagi sa Suroy-Suroy sa Sugbo mailhan usab ang tinago nga mutya sa ilang barangay sa ubang mga turista sa nasud nga makapakusog sa ilang ekonomiya.

Samtang si Tudela Mayor Greman “Jojo” Solante, nipadayag usab sa iyang kalipay nga mahimong usa sa mga host nga lungsod sa ikaduhang Suroy-Suroy karong tuiga.

Si Solante nagpasalamat nga gilakip ang mangrove forest ug marine sanctuary isip kabahin sa itinerary.

Gipaambit usab ni Solante ang ilang mga plano sa pagbutang og mangrove forest sa matag barangay sa Tudela isip kabahin sa ilang marine conservation efforts.

Ang Bukilat Cave sa Lungsod sa Tudela mao ang ikaduhang stopover sa Suroy-Surpy sa Sugbo. Matud sa local tour guides nga ang langub maoy na-feature isip usa sa filming site sa pelikulang “Can’t help falling in love” nga gibidahan nila ni Kathryn Bernardo ug Daniel Padilla.

Dugang ni Solante nga lakip sa ilang gipasiugdahan mao ang ilang food tourism nga naglakip sa seafood nga gihinganlan og “Takla. — /BDB (BANAT NEWS)