3rd Cor Jesu Cup mo-implementar og all-to-play format

CEBU, Philippines — Nadasig sa ilang tinguha nga mohatag og patas nga kahigayonan sa mga players, mopatuman og all-to-play format ang 3rd Cor Jesu Invitational Volleyball Tournament sa Nobyembre 7-8 diha sa Sacred Heart School-Ateneo de Cebu (SHS-AdC) sa Barangay Canduman, dakbayan sa Mandaue.

Ubos ning bag-ong lagda, ang tanang magdudula nga nalista sa lineup kinahanglang makaduwa aron mahatagan og tsansa ang matag usa nga makapakita'g aksiyon lakip na ang mga dili pa kaayo hanas.

Si Ian Callet, sakop sa organizing committee, nagkanayon nga ang tumong sa no-benching rule nga dili lang ang mga maayong players ang kanunayng saligan sa mga coach samtang ang uban igo ra nga nagpasinaw sa ilang bangko sa tibuok duwa.

“Our goal is not to focus on players who already have skills, but to give everyone equal opportunities,” matud pa ni Callet.

Ubos sa giusab nga lagda, mahimong mosulod ang mga puli nga magdudula sa dihang makaabot na sa 10 puntos ang kontra o kon maabot na ang katunga sa puntos nga gikinahanglan aron modaog sa usa ka set. Pinaagi niini, mas daghang magdudula ang makasinati sa aktuwal nga kompetisyon ug makapalig-on sa ilang pagsalig sa kaugalingon.

Alang ni Ralph John Inot, kanhi athletic director sa SHS-AdC nga nalambigit sa teknikal nga pagpangandam sa torneyo, hagit usab kini sa mga coach sa pagpalambo sa ilang mga atleta ug sa maayong pagdumala sa ilang lineup. “This is a challenge and chance for coaches to develop also because of how he will set up his pieces on the court,” dason pa ni Inot.

Sa unang higayon, magdugang ang Cor Jesu Cup og 10-under girls division, nga mokuyog sa 12-under ug 15-under categories aron mahatagan ang mga batang magdudula og unang kasinatian sa organisadong kompetisyon sa volleyball.

“The Cor Jesu Cup is a tournament para gyud sa atong mga bata ug sa atong grassroots program. We have tournaments for our varsity, but we have a tournament for kids to have fun,” kanayon pa ni Inot.