BC Cheetahs 4-0 na, Webmasters namawi

CEBU, Philippines — Ang Benedicto College (BC) Cheetahs nimintinar sa perpekto nilang sinugdanan, samtang ang University of Cebu (UC) Webmasters dali nga namawi sa miagi nilang kapildihan sa Cebu Schools Athletic Foundation, Inc. (CESAFI) Season 26 basketball tournament niadtong Domingo sa gabii, Septiyembre 20, sa Cebu Coliseum.

Si Serge Gabines mipupo og 20 puntos, unom ka rebounds, duha ka assists, ug tulo ka steals aron ituboy ang Cheetahs ngadto sa 67-53 nga pagbugha sa Cebu Institute of Technology-University (CIT-U) Wildcats.

Sila si Kenneth Babalcon ug Junil Bulan parehong mi-iskor og 12 puntos matag usa samtang nagkumbinar og pito ka rebounds, 11 ka assists, ug unom ka steals sa dihang gipabughtan sa Cheetahs ang ilang pagkupot sa solong liderato sa college division uban ang 4-0 rekord.

Si Wayne Victor Gementiza mihipos og 12 puntos ug pito ka rebounds alang sa Wildcats, nga natagak sa 2-2.

Sa laing collegiate matchup, ang UC Webmasters nakabangon dayon sa miagi nilang pagkahagba ug gipahimuntangtan sa ilang kapungot ang University of Southern Philippines Foundation (USPF) Panthers, 77-52. Si Luther Leonard nangu sa upat ka UC players nga mikadlit og double figures bitbit ang 12 puntos, tulo ka rebounds, ug tulo ka assists.

Miposte si Maverick Eligoyo og double-double nga 11 puntos ug 12 ka rebounds uban ang tulo ka assists ug tulo ka steals, samtang sila si Juan Raphael Garro ug Jepherson Nonol miamot og 10 puntos matag usa sa dihang giinat sa Webmasters ang ilang baraha ngadto sa 4-1.

Si Ashly Howard Dennison mitali og 12 puntos ug siyam ka rebounds samtang si Christian Jayvee Deiparine adunay 11 puntos ug upat ka rebounds alang sa Panthers, nga nakatilaw sa ikatulo nilang pildi sa upat ka duwa. Sa juniors division, ang reigning five-peat champions Sacred Heart School-Ateneo de Cebu (SHS-AdC) Magis Eagles milatigo sa USPF Baby Panthers, 59-42, alang sa ikaduha nilang sagunson nga daog. Si Gabriel Gonzales usa sa mga bida sa Magis Eagles uban ang 13 punbtos, unom ka rebounds, upat ka steals, ug tulo ka blocks. Si Lian Kent Basa miduhang og 11 puntos, pito ka rebounds, pito ka steals, duha ka assists, ug usa ka block, samtang si Jibson Gaviola midonar og double-double nga 10 puntos ug 12 ka rebounds.

Si Jayhaad Aguipo mireshitro og doudle-double nga 10 puntos ug 10 ka rebounds apan dili kini igo kay ang Baby Panthers nadagma sa ikaduhang sunod-sunod nga higayon.

Sa laing bahin, si Ajun Luchavez mikolekta og 19 points, lima ka rebounds, ug usa ka block sa dihang  gilampaso sa University of the Visayas (UV) Baby Lancers ang San Carlos School of Cebu (SCSC) Baby Warriors, 85-67, alang sa una nilang daog.

Si Darlico Kuno Gantuangco mitimbre og 15 puntos samtang si Kirbey Borbon miharos og 12 puntos, 10 ka rebounds, unom ka steals ug usa ka assist alang sa Baby Lancers.

Si Ahron Andrei Casul mipabuto og 21 puntos, samtang sila si Heath Lauren Macapil ug Alfredo Zafra III nagkumboya'g 21 puntos apan nakawang ang ilang paningkamot kay ang Baby Warriors nahagsa sa 1-2.