Spain kampiyon sa World Cup

CEBU, Philippines — Si Ferran Torres maoy nahimong bayani sa dihang gipalayas sa Spain ang Argentina sa ilang trono 1-0 aron langkaton ang korona sa kampiyonato sa FIFA World Cup 2026 sayo kagahapon sa buntag  (Hulyo 20 oras dinhi sa Pilipinas) didto sa MetLife Stadium sa East Rutherford, New Jersey.

Mao kini ang unang titulo sa Spain sukad sila naghari niadtong 2010 ug ikaduha pa lamang sa kinatibuk-an sa 96 ka tuig nga kasaysayan sa World Cup.

Ang Barcelona striker nga si Torres misilyo sa dominanteng salida sa Spain pinaagi sa paglansang sa nakapadaog nga goal sa ika-106 nga minuto.

"Ultimately, the goal belongs to 47 million people -- not just me or the 26 players," buhagay pa ni Torres nga mihalad sa naglagiting nilang kalamposan ngadto sa tibuok nilang nasud.

  "At the end of the day, all finals are tough; when you're up against Messi, there's a certain nervousness, but we always believed in our football and in ourselves," dugang pa ni Torres.

Gawas ni Torres, nadoble sab ang kalipay sa team captain nilang si Rodri human nadaog niini ang Golden Ball award isip labing maayong player sa torneyo.

"Even myself I cannot express with words," matud pa ni Rodri. "I think now we're like in a cloud."

"It's been a very tough time. I just want the new generations to see my example as an opportunity -- when you go down you can rise again," padayon pa sa 30-anyos nga midfielder sa Manchester City.

Samtang naghudyaka ang Spain, wala kapugngi ni Argentina legend Lionel Messi ang paghilak taliwala sa ilang kapildihan.

Buot unta ni Messi nga manamilit sa labing dako nga bantawan sa football sa tibuok kalibutan nga daogan apan nahugno ang iyang damgo.

Napakyas man tuod apan usa gihapon kini ka mabungahon nga kampanya alang ni Messi.

Ang 39-anyos nga si Messi nahimo nga ikaduha pa lamang nga player sa kasaysayan nga nakaduwa sa World Cup finals tulo ka higayon. Iyang gitabla ang rekord ni Brazilian great Cafu.

Ang bangiitang Brazilian nga si Pele nakadaog og tulo ka World Cups, apan wala makaduwa sa 1962 final tungod sa injury. Samtang ang ngilngig nga kababayan ni Messi nga si Diego Maradona nakapakita'g aksiyon sa duha ka finals.