Pureblends kukuning head coach si Cardel

MANILA, Philippines — Magbabalik sa liga si Johnedel Cardel bilang ba­gong head coach ng ba­gong koponan na Pureblends simula sa PBA Season 50.

Bagama’t hindi pa na­isasapinal ang pagpasok sa liga ay maugong na si Cardel ang inaasahang ma­mumuno sa Pure­blends matapos ang isang taong pagkawala sa PBA.

Noong PBA Season 49 Governors’ Cup pa huling nag­mando ng koponan si Cardel para sa Terrafirma bago palitan ni Raymond Tiongco.

Napalitan na rin si Tiong­co ngayon sa Dyip sa pagpasok ni Ronald Tubid na dating team ma­nager, bilang bagong head coach nito.

Para kay Cardel, inaa­sahang dalhin niya ang ba­gong coaching staff sa Pureblends na ayon pa sa mga ulat ay siya na ang na­ngunguna sa ensayo matapos ang pag-alis ng mga dating coaches nito.

Si Cardel ang nanguna sa makasaysayang playoff appearance ng Terrafirma noong 2024 PBA Philippine Cup na inaasahang dadalhin niya rin sa Pureblends.

Ang dating NorthPort head coach na si Bonnie Tan, inaasahang aakyat ng posisyon, lamang ang na­natili sa Pureblends, habang nasa Terrafirma na ang mga assistant coaches na sina Jaren Jarencio at Jeff Napa.

Hindi pa sigurado kung team manager o team go­vernor ang magiging posisyon ni Tan, habang ang maging ang team manager ng Batang Pier na si Pido Ja­rencio at assistant na si Waiyip Chong ay ina­a­sa­hang maging team go­vernor at team manager na rin ng Dyip, ayon sa pagkakasunod.

Isasinapinal na ng NorthPort ang pagbebenta ng franchise ‘lock, stock and barrel’ nito sa Pure­blends matapos aprubahan ng PBA Board sakto sa pagdiriwang ng liga ng golden anniversary nito bilang kauna-unahang professional basketball league sa Asya.