Altas wawalisin ang Generals sa Game 2

MANILA, Philippines — Desidido ang defen­ding champion Perpetual Help Altas na tapusin ang Emilio Aguinaldo College Generals sa Game Two ng NCAA Season 99 volleyball championship bukas sa FilOil EcoOil Centre sa San Juan City.

Pakay ng Altas na ukitin ang historic ‘four-peat’ at ika-14 sa kabuuan.

Kinaldag nila ang Ge­ne­rals sa Game One ng ka­­­nilang best-of-three title series.

Umiskor ang Perpe­tu­al ni multi-titled coach Sammy Acaylar ng 24-26, 25-20, 27-25, 25-19 panalo kontra sa EAC ni coach Rod Palmero.

Llyamado ang Altas dahil may championship experience na sila kumpara sa Generals na una pa lang nilang maglaro sa Finals sa loob ng siyam na taon.

Nagtala si reigning MVP Louie Ramirez ng 23 points at 23 excellent re­­ceptions at bumakas si Jefferson Marapoc ng 20 markers at 27 digs sa pa­nalo ng Perpetual.

“What we have in mind is that we have to finish in Game Two,” ani Ramirez.

Nais nina Ramirez, JC Enarciso, Michael Medalla, libero John Philip Pepito at Paul Teodoro na makapagbigay ng karangalan sa Altas sa kanilang final pla­ying year.

Samantala, ilalarga rin ang Game Two sa wo­men’s division kung saan magtatapat ang defending champion St. Benilde Bla­zers at Letran Lady Knight.