Galanza hindi isinuko ang laban ng Creamline sa Game 1
MANILA, Philippines — Bumangon ang nagdedepensang Creamline mula sa 5-9 agwat sa fourth set para talunin ang sister team Choco Mucho sa Game One ng 2024 Premier Volleyball League All-Filipino Conference Finals sa harap ng 17,457 fans noong Huwebes sa Smart Araneta Coliseum.
Ayon kay Jema Galanza, wala sa isip niya ang sumuko.
“Kapag nakikita mo ang mga teammates mo na lumalaban at nagchi-cheer, sino kami para sumuko? Ilalaban talaga namin. Kaya sobrang sarap sa feeling na nakuha namin ito (panalo),” sabi ni Galanza.
Tumapos ang dating kamador ng Adamson Lady Falcons sa UAAP na may 20 points sa 24-26, 25-20, 25-21, 25-16 paglusot ng Cool Smashers sa Flying Titans sa series opener ng kanilang best-of-three championship series.
Nagdagdag si Tots Carlos ng 17 markers para sa Creamline, habang may 11 points si Bea De Leon mula sa bench.
May siyam na marka si Alyssa Valdez at nag-ambag sina Bernadeth Pons, Michele Gumabao at Pangs Panaga ng walo, pito at limang puntos, ayon sa pagkakasunod.
Binanderahan ni Sisi Rondina ang Choco Mucho sa kanyang 27 points, habang may 15 markers si Royse Tubino.
Tumipa sina Isa Molde, Maddie Madayag, Maika Ortiz at Deanna Wong ng pinagsamang 19 points.
Matapos isuko ang first set ay inagaw ng Cool Smashers ang sumunod na dalawang sets para sa 2-1 bentahe sa Flying Titans.
Sa fourth set ay kinuha ng Choco Mucho ang 9-5 abante bago kumamada sina Galanza at Carlos.
- Latest