Nuggets milatigo sa wolves

Miangkon og balik sa unang puwesto sa West

CEBU, Philippines — Si Nikola Jokic mirapido og 41 puntos sa dihang giangkon og balik sa Denver Nuggets ang unang puwesto sa NBA Western Conference uban ang 116-107 nga kadaogan batok sa Minnesota Timberwolves kagahapong adlawa didto sa Ball Arena sa Denver, Colorado.

Tungod niini, ang defending NBA champion naglabaw balik og usa ka duwa sa sikit nga karera sa NBA playoffs. Tungod kay inilog kaayo sila sa katapusan nilang duha ka duwa sa regular season batok sa Memphis Grizzlies ug San Antonio Spurs, ang Nuggets nga nagbitbit og 56-24 rekord mao na karon ang paborito nga motapos isip top seed sa West nga maka-angkon og home court advantage sa tibuok bahin sa giatngan nga playoffs.

Si Jokic, nga mipupo sab og 11 ka rebounds, pito ka assists ug tulo ka steals, nakakuha og dakong suporta gikan nilang Jamal Murray ug Michael Porter Jr. nga nagkumboya'g 38 puntos.

Si Anthony Edwards maoy nangu sa Wolves uban ang 25 puntos. Si Mike Conley mi-iskor og 19 samtang sila si Rudy Gobert ug Naz Reid mihipos og 13 puntos sa pilderong kawsa.

Ang Wolves natagak sa ikatulong puwesto sa West sunod sa Oklahoma City Thunder. Bisan ang Wolves ug OKC nagkupot og parehong 55-25 nga baraha uban ang duha ka duwa na lang nga nahibilin, ang Thunder nakabentaha sa Minnesota kortesiya sa nindot nilang divisional record.

Ang Thunder mikatkat sa ikaduhang dapit human gilampaso ang Spurs, 127-89, ubos sa pagpangu ni Shai Gilgeous-Alexander nga mikadlit og 26 puntos.

Samtang ang Phoenix Suns dali nga mibangon gikan sa miagi nilang kapildihan didto sa ilang korte ug gipahimungtan sa ilang kapungot ang Los Angeles Clippers, 124-108.

Si Devin Booker mipabuhagay og 37 puntos alang sa Suns samtang sila si Kevin Durant ug Bradley Beal nagkumbinar og 50 puntos.

Bitbit ang 47-33 nga marka, ang Suns duna pay tsansa nga makabira og awtomatik nga luna sa playoffs ilabi na kay usa ka duwa lamang ang ilang gintang sa New Orleans Pelicans nga maoy nag-okupar sa ikaunom nga luna sa West uban ang 47-32 rekord.