Binulan nga torneyo ibalik sa CEPCA

CEBU, Philippines — Ibalik sa Cebu Executives and Professionals Chess Association (CEPCA) ang binulan nilang torneyo sugod karong Domingo, Pebrero 25, didto sa Robinsons Galleria Cebu.

Ang labing karaan nga organisasyon sa ahedres gawas sa Manila mipahigayon og regular nga kompetisyon bisan niadtong panahon sa pandemiya pinaagi sa online platform apan mao pa lamang kini ang unang higayon sud sa tulo ka tuig nga ila kining pagahimoon nga OTB (over the board) sa matag bulan.

Gipasiugdahan sa dugay na kaayong presidente sa CEPCA nga si Engr. Jerry Maratas, ang usa ka adlaw nga pinug-anay sa utok nga magsubay og five-round Swiss system format abli lamang sa mga Cepcans, seniors, ladies, ug kiddie (12 Under) players.

Ang kampiyon mobulsa P1,200, ang ikaduha ug ikatulo makadawat og P500 ug P300, samtang ang mopahiluna sa ikaupat ug ikalimang dapit adunay P200 matag usa.

Sama sa miagi, ang nag-unang duha ka mananaog mo-abante sa grand finals nga giulohan og "Battle of Champions" nga magsilbeng panapos nga kalihukan sa CEPCA karong Disiembre.

Ang rehistrasyon nagkantidad og P100 ug limitado lamang sa 50 ka entrante.

Alang sa dugang impormasyon, kadtong mga interesado mahimong mokontak ni Kevin Yap (09458559800) o Edwin Cablao (09171383181).