SGL ‘di na puwede sa NCAA Season 100
MANILA, Philippines — Muling magpapatupad ng mahigpit na patakaran ang pamunuan ng National Collegiate Athletic Association (NCAA) partikular na sa mga student-athletes na naglalaro sa professional leagues.
Sa pagsisimula ng NCAA Season 100 sa Hunyo ay hindi na pahihintulutan ang mga student-athletes na maglaro sa anumang professional leagues.
Noong pandemya ay binigyan ng NCAA ng pagkakataon ang mga players nito na makapaglaro sa professional league sa ilalim ng programa ng Games and Amusement Board (GAB) na special guest license (SGL).
Bago maglaro sa pro leagues ay kailangan muna ng student-athlete na makakuha ng clearance mula sa kaniyang unibersidad na pinapasukan.
Ang kaniyang eskuwelahan ang magpoproseso upang makakuha ng pahintulot sa NCAA bago naman humiling ng SGL sa GAB.
Kapag may SGL ang student-athlete ay maaari na itong makapaglaro sa pro leagues na hindi naaalis ang kaniyang amateur status at maari pa ring makapaglaro sa NCAA.
Subalit nais na itong tuldukan ng NCAA.
Magsisimula ito sa darating na season ng liga.
Ang sinumang lalabag ay awtomatikong mawawalan ng eligibility playing years sa liga.
Nilinaw ni Arellano University representative to the management committee Peter Cayco na hindi naan na bago ang ganitong patakaran sa NCAA.
Dati na itong ipinatutupad sa liga bago pa man mag-pandemya.
Pinag-aaralan na rin ng liga na baguhin ang patakaran sa transferees.
- Latest
