Giannis nag-wild, Bucks mipaluhod sa Mavs
CEBU, Philippines — Si Giannis Antetokounmpo mipaulbo og 40 puntos samtang si Damian Lillard midugang og 27 puntos sa dihang gibugha sa Milwaukee Bucks ang Dallas Mavericks, 132-125, sa NBA kagahapong adlawa didto sa Fiserv Forum sa Milwaukee, Wisconsin.
Bangis kaayo si Antetokounmpo nga mipasud og 18 sa 26 niya ka itsa apil na ang duha ka tres. Milangkat sab siya og 14 ka rebounds ug mipasa og pito ka assists alang sa ikaupat nga sagunson nga daog sa Bucks.
Sila si Kyrie Irving ug Luka Doncic nagkumboya'g 74 puntos apan nangahoyhoy ang ilang abaga gumikan kay ang Mavs nahagsa sa 9-4.
Didto sa San Antonio, sila si Jaren Jackson Jr. ug Desmond Bane nagkumninr og 53 puntos sa dihang gitunolan sa Memphis Grizzlies ang Spurs sa ikawalo niining sunod-sunod nga pilde, 120-108.
Si Santi Aldama miamot og 17 puntos alang sa Grizzlies, nga madasigong mibangon human malubong og 19 puntos. Ilang gikastigo ang Spurs, 33-14, sa pinal nga kuwarter sa impresibo nilang pagbalitok.
Ang star rookie sa Spurs nga si Victor Wembanyama mitapos uban ang 19 puntos ug 13 ka rebounds samtang si Keldon Johnson mitali og 22 puntos sa pilderong kawsa.
Sa laing aksiyon, si Shai Gilgeous-Alexander mipabuhagay og 40 puntos, unom ka rebounds ug unom ka assists sa dihang gipatilaw sa Oklahoma City Thunder ang Golden State Warriors sa ikaunom niining sagunson nga pilde sud sa overtime, 130-123.
Ang eksplosibong rookie nga si Chet Holmgren mikuha sab og atensiyon alang sa Thunder uban ang 36 puntos, 10 ka rebounds, ug lima ka assists.
- Latest
