Pacers mibihag sa Bucks, Haliburton maoy bida

CEBU, Philippines —  Ang Indiana Pacers nakasugakod sa 54-puntos nga gipabuto ni Milwaukee star Giannis Antetokounmpo aron patikangkangon ang Bucks, 126-124, sa NBA kagahapon didto sa Gainbridge Fieldhouse sa Indianapolis, Indiana.

Si Tyrese Haliburton maoy nangu sa Pacers uban ang 29 puntos apil na ang hagpok kaayo niyang 3-pointer sa pinal nga 1:19 nga maoy nakapalabaw kanila sa hingpit.

Mipasa sab si Haliburton og 10 ka assists samtang si Canadian forward Bennedict Mathurin mitali og 26 puntos ug milangkat og 11 ka rebounds alang sa Pacers nga dalaygong mibangon human mabiyai og 10 puntos sa katapusang kuwarter.

Samtang si Antetokounmpo usa na lang ka lugas unta ang kuwang aron tablahon ang career-high niyang 55 puntos. Duna sab siyay 12 ka rebounds ug tulo ka assists.

Apan nakawang ang pagmangtas ni Giannis nga nakatapak unta sa haw-ang nga gibiyaan ni Damian Lillard nga wala makapakita'g aksiyon gumikan kay nayayay.

Si Khris Middleton mihipos og 19 puntos apan nasipyat sa iyang tres nga makatabla unta sa duwa sa nahibiling 6.9 segundos.

Didto sa Mexico City, si Trae Young mipabuhagay og 41 puntos aron aswaton ang Atlanta Hawks ngadto sa 120-119 nga pagpayaka sa Orlando Magic.

Abante unta ang Magic og dos puntos sa hilimatyong segundos apan si Dejounte Murray way kurat nga milansang sa krusyal nilang 3-pointer sa katapusang 31 segundos aron paluparon ang Hawks sa kulbahinam nga daog.

Ang maong duwa, nga gidugokan og dul-an sa 20,000 ka fans didto sa Mexico City Arena, usa sa duha lamang ka regular-season games sa NBA gawas sa Amerika ning season.

Ang ikaduha ipahigayon sa Enero 11 sunod tuig didto sa Paris, France diin mag-abot ang Brooklyn Nets ug Cleveland Cavaliers.