Donling Cup 2024 kasado na

CEBU, Philippines — Andam na ang tanan alang sa pagbukas sa Donling Cup 2024 karong Domingo, Nobiyembre12 diha sa Ateneo de Cebu old campus sa Mango Avenue, Cebu City.

Napulo ka teams ang magkumbati sa maong liga nga giorganisar sa Brothers Ball Club ubos sa pagdumala ni Marvin Sillar.

Ang mga partisipanteng koponan uban sa ilang team manager mao ang Ranny Colansi Cup 2023 champions Donling Aircon and Refrigeration Services ni Romeo 'Don' Quilaton Jr. uban sa runner-up niining JMD Automotive ni Gerald Dilao, Goutsource Solution International (GSI) ni Ivan Llesol, CJL Sniper ni James Lapinig, Gavens Water Refilling Station ni Kevin Mamac, New Era ni Chris Ivan Batitay, Bucket Blazers ni Chyrus Blen, JLT Sorbeteros ni Jack Leonard Tagacanao, Bert Enterprises ni Gilbert Sabal ug Cebu Grand Prix ni Errol Mendoza.

Moduwa sila ubos sa single round robin format sa elimination, diin ang top two teams automatic moabante sa semifinals.

Upat ang matagak sa elimination round, ang no. 3 moharong sa no. 6, ug ang 4 batok no. 5 sa knockout quarterfinal. Ang mga modaog maoy moangkon sa nahabiling duha ka luna sa semis.