Alburo miagak sa Gavens Water Refilling Station, JSV nidaog sab
CEBU, Philippines — Bisan dos puntos ra ang nahimo ni Joffrey Alburo, apan dako kini'g natampo sa 53-52 nga kadaogan sa Gavens Water Refilling Station batok sa Cebu Locksmith sa kulbahinam nilang duwa sa Ranny Colansi Cup 2023 niadtong Domingo diha sa Ateneo de Cebu sa Mango Avenue, Cebu City.
Kulba kaayo ang aksyon sa hinapos nga bahin sa duwa kay anaa na unta sa baba sa kadaogan ang Cebu Locksmith dihang sila labaw unta'g usa ka lugas sa nahabiling 32 segundos, 52-51 apan pakyas kay nakuha ni Joffrey Alburo ang bola gikan nag-iloganay nipasud sa iyang tira nga nipalabaw sa Gavens Water, 53-52 sa katapusang 12 segundos. Gihataga'g laing higayon ang Cebu Locksmith nga modaog, apan pakyas gihapon human si Joshua Banaag napalpak sa iyang pag-drive.
Si Ryan Mamac maoy topscorer sa Gavens ug best player nga mihakot og 15 puntos uban ang 5 rebounds ug 4 assists. Sila si Reynald Sinadjan ug Justine Sembrano nag-amotay'g 14 ug 10 puntos. Sila si Francis Bauntad ug Michael Daan nagkumbinar og 21 puntos aron mangu sa scoring sa Cebu Locksmith.
Sa laing aksyon, ang JSV Cuisine nidaog sab batok CJL Sniper
Ang best player nga si Dan Cardenas ang nangu sa JSV pinaagi sa iyang 17 puntos, upat ka rebounds ug lima ka assists, gisundan ni Charlee Ocanada nga dunay 14 puntos ug JJ Vestra sa iyang 13 puntos. Si CJ Monterola ang nangu sa CJL nga mikadlit og16 puntos, samtang si Michael Tan mikulit og 11 puntos.
Ang JSV ni Jeremias Vestra ug Gavens ni Kevin Mamac adunay 1-0 records, samtang ang CJL ni James Lapinig ug Cebu Locksmith ni Nestle Key Flores nalihia'g pilde ning 10 ka Domingo nga liga nga gipadagan sa Brothers Ball League ubos sa pagpangulo ni Marvin Sillar.
- Latest
