Crawford gikulata si Spence

CEBU, Philippines — Sa usa ka impresibong pagpakita sa abilidad sa boksing, gipapha ni Terrence Crawford ang mga pagduda sa mga dili ganahan kaniya nga siya maoy angayang bansagang hari sa welterweight division human iyang gikulata ang karibal nga si Errol Spence Jr. sa main event kagahapon didto sa T-Mobile Arena sa Las Vegas, Nevada.

Sa ikaduhang round, nagsugod og arangkada ang makina ni Crawford ug nakapasud og mga kombinasyon nga nakapa-knockdown ni Spence.

Pwerteng kurata sa tanan ilabi na ang mga miron ni Spence. Bisan si Spence daw nakalitan sa nahitabo kay mao pa kini ang unang higayon nga dunay nakapatumba kaniya sa aktwal nga away. Maayo nalang nga naabtan siya sa bagting.

Sa sunod nga mga rounds, kampante na kaayo si Crawford sa iyang mga atake nga halos dili masagang ni Spence.

Misuway og bawos si Spence apan pirmeng mapalaw og duslak sa jabs ni Crawford.

Sa round 4 mura na og langgam si Spence nga gitarget-target ni Crawford hangtud nga nisunggo ug nagkadugo ang ngabil niini.

Sa pagsugod sa ikalimang round gipangutana si Spence sa doktor kun mopadayon pa kini.

Sa round 7 napatumba siya ni Crawford kaduha, swerte nga naabtan kini sa bagting.

Sa ikawalong round, gamit ang tanang nahibaw-ang atake ug footworks gihimo ni Spence apan murag mat-an pa sa pinya si Crawford.

Sa round 9 mura og ihong nagmangtas si Crawford ug gikilaw ang nagkadugong si Spence pinaagi sa sagunson nga mga kombinasyon nga walay ikatubag ang naulahi. Ang referee midesider sa paghunong sa away via technical knockout (TKO) sa 2:32 minuto sa ikasiyam nga round.

Si Crawford usa na ka 3- division undisputed champion sa 135lbs, 140lbs, ug147lbs. division –IBM