Giannis mibalik nga madaogon

CEBU, Philippines —  Nagparamdam dayon si Giannis Antetokounmpo sa iyang pagbalik gikan sa injury human siya mipabuhagay og 46 puntos aron pangulogan ang Milwaukee Bucks ngadto sa 133-124 nga pagpakaging sa Sacramento Kings sa NBA kagahapong adlawa didto sa Golden 1 Center sa Sacramento, California.

Si Antetokounmpo milangkat sab og 12 ka rebounds ug mipasa og upat ka assists alang sa Bucks nga nagmangtas sa second-half diin sila mipatuasik og 80 puntos aron patikalbongon ang Kings.

Dako sab og naambag sila si Khris Middleton ug Brook Lopez nga nagkumboya'g 54 puntos alang sa Bucks nga madasigong mibangon human mabiyai og 15 puntos aron pahugtan ang ilang pagkupot sa liderato sa Eastern Conference uban ang 49-19 nga baraha.

Si De'Aaron Fox mikadlit og 35 puntos sa pilderong Kings.

Sa laing aksiyon, gipakuratan sa Houston Rockets ang inilog nga Boston Celtics, 111-109, bisan pa man sa gipabutong 43 puntos sa alas sa Celtics nga si Jaylen Brown.

Ang Fil-Am nga si Jalen Green maoy nangu sa Rockets uban ang 28 puntos.

Duna pa untay tsansa ang Celtics nga makapuwersa og overtime apan nasipyat ang layup ni Jayson Tatum.

Didto sa San Francisco, si Klay Thompson mituboy sa Golden State Warriors ngadto sa 123-112 nga pagpakaging sa Phoenix Suns.

Si Thompson mibomba og 33 sa iyang 38 puntos sa first half apil niini ang walo ka 3-pointers.

Sila si Steph Curry ug Jordan Poole nagkumboya'g 43 puntos lalang sa Warriors nga ikalima karon sa Western Conference standings bitbit nang 36-33 record.

Sa laing resulta, si Jimmy Butler migiya sa Miami Heat ngadto sa 119-115 nga kadaogan batok sa Utah Jazz.  Si Butler mitapos uban ang 24 puntos aron pangulohan ang pito ka Miami players nga mitali og double figures.

Sila si Tyler Herro ug Gabe Vincent parehong mipupo og 18 puntos, si Bam Adebayo mi-iskog og 16, si Kevin Love mitali og 11 samtang sila si Victor Oladipo ug Caleb Martin dunay tinigum nga 21 puntos alang sa Heat.