Jordan bumawi sa Gilas Pilipinas

MANILA, Philippines — Ipinakita ng Gilas Pilipinas ang kanilang puso.

Ngunit sa huli ay pu­manig ang suwerte sa bisitang Jordan.

Itinakas ng mga Jordanians ang dramatikong 91-90 panalo laban sa Nationals sa sixth at final window ng FIBA World Cup Asian Qualifiers kahapon sa Philippine Arena sa Bocaue, Bulacan.

Ang dalawang mintis na free throws ni Scottie Thompson sa huling 31.3 segundo at tumalbog na jump shot ni Bobby Ray Parks Jr. sa pagtunog ng final buzzer para sa Gilas Pilipinas ang naglusot sa Jordan.

Tumapos si naturalized player Justin Brownlee na may 41 points, 12 rebounds at 3 assists para sa 6-4 record ng Gilas katabla ang Jordan sa Group E sa ilalim ng Lebanon (7-2) at New Zealand (7-2).

“We made a big run in the second half and they withstood it and came away with the win,” wika ni Brownlee na ibinangon ang Nationals mula sa 25-point deficit, 16-41, sa second period para makatabla sa 88-88 galing sa tip in ni Jamie Malonzo sa huling 1:52 minuto ng fourth quarter.

Humakot naman si naturalized big man Dar Tucker ng 22 markers at 12 boards para sa mga Jordanians.

“Just focus. Weather we’re down or up, we just stay focus,” wika ni Tucker sa nasabing pagresbak ng home team. “I have nothing but respect for the Philippine team, they are a very good team.”

Huling nakadikit ang Gilas sa 90-91 galing sa jumper ni Brownlee sa nalalabing 1:30 minuto ng laro matapos ang dunk ni Jordan center Caden Chudri Zuheir Alnajdawi.

Bigo ang Nationals na maagaw ang panalo makaraan ang mintis na free throws ni Thompson at jumper ni Parks sa pagtunog ng final buzzer.

Nagdagdag si Malonzo ng 11 points at may tig-9 at 8 markers sina Thompson, Jordan Heading at Parks, ayon sa pagkakasunod. 

Umiskor naman si Freddy Ibrahim ng 19 points para sa mga Jordanians na nagsalpak ng 15 triples kasama ang tatlo ni Sami Bzai.

Nagmula ang Gilas mula sa 107-96 pagpapabagsak sa Lebanon noong Biyernes tampok ang debut ng 34-anyos na si Brownlee.