Black Panthers kampiyon sa Newtown Estate Basketball League

CEBU, Philippines — Ang Black Panthers maoy milugwa nga kampiyon sa 2022 Newtown Estate Basketball League (NEBL) didto sa Barangay Pardo, dakbayan sa Sugbo ning  bag-onay pa lamang.

Mibugwak og nagkayong opensiba gikan sa pagsugod hangtud sa katapusang bahin sa 40 minutos nga aksiyon, gilat-an sa Black Panthers ang Empenomenon Gray, 91-68, sa tinagakay nilang final match aron langkaton ang gihandum nilang titulo.

Ang 29-anyos nga si Jhoneil Allen Geraldizo, nga maoy nangu sa Black Panthers uban ang 24 puntos, misidlak nga labing hayag sa tanang mga players gikan sa walo ka entranteng koponan.

Si Geraldizo mi-average og makapakurat nga triple-double uban ang 28 puntos, 12 ka rebounds ug 10 ka assists matag duwa hinungdan nga siya maoy gibayaw nga Most Valuable Player (MVP).

Sila si Charly Mancao ug John Sojero nagkumboya'g 35 puntos, si Marlon Sabellano midugang og 12 puntos samtang sila si Jepoy Vargas ug Joseph Tanajura nagkumbinar og 15 puntos timaan sa balanseng ataki sa Black Panthers. Ang Black Panthers ubos sa pagtimon ni playing coach Limito "Jun" Caraballe inabagan ni konsehal Rey Gealon nga maoy ilang team manager.

Si Berhel Cartuciano mipupo og 23 puntos, si Mambeth Mancao mi-iskor og 10, samtang sila si John Keynes Honoridez, Khirk Ericson Saclao ug Dimitri Ricafranca nakatigum og 21 puntos sa pilderong Gray.