Barili, Moalboal nanghawod sa Cabaron Cup volleyball

CEBU, Philippines — Ang Barili ug Moalboal milugwa nga mga kampiyon sa 1st Mayor Inocentes Cabaron Invitational Inter-Town Volleyball Tournament niadtong weekend didto sa Moalboal covered court sa lungsod sa Moalboal, habagatang bahin sa Sugbo.

Luyo sa mahait nga mga ataki nilang Aaron Beryl Ricaplaza ug Christian Karampatana, ang Barili mipaluhod sa host Moalboal sud sa upat ka sets, 20-25, 25-22, 25-22, 25-17 aron birahon ang korona sa men's division.

“Team Moalboal is really a threat for us, but we just had the will to win," matud pa ni Ricaplaza.

Ang Barili team naglangkob sab nilang Alfonzo Obtina, James Timagos, Franz Piala, Svens Daclan, Rachaelus Nemeno, John Bargamento, Demterio Sta. Ana, Jester Clyde Bayang, Lance Manego, Ryan Paler, John Cydric Bayang ug John Paul Bulang. Mibulsa sila og P50,000 nga ganting salapi.

Duna hinoon gihapoy angayan nga ikalipay ang Moalboal human ilang gibaslan ang Barili aron sakmiton ang titulo sa women's category.

Ubos sa pagpangu nilang Marybelle Rose Cabaron, Jasmine Omagac, Junabelle Gempero, Juliana Isabel Gabales, Mary Christine Rebano, ug Shellce de la Rita, ang Moalboal mibugha sa Barili, 25-12, 25-14, sa tinaghakay nilang duwa aron kubrahon ang P50,000 nga premyo.

Mipakita sab og aksiyon uban sa Moalboal sila si Rayvinder Tarongoy, Jay Ann Tapales, Ivony Love Templado, Lyka Sabanal, Jishin Faith Omagac, ug Precious May Domugho.