Katapusang batch sa Yaw-Yan Summer Clinic misikad na
CEBU, Philippines — Ang ikatulo ug katapusang batch sa Yaw-Yan Summer Clinic nga gipasiugdahan ni Master Benigno "Ekin" Caniga, Jr. sa Yaw-Yan Ardigma ug Muay Thai Association of the Philippines mi-arangkada na sa Yaw-Yan Gym nga anaa mahimutang sa 4th floor sa Coast Pacific Downtown Center atbang sa UC-Main sa may dalan Sanciangko, dakbayan sa Sugbo.
Si Caniga, ang founder ug CEO sa Yaw-Yan Ardigma nga usa sab ka tinamod nga mixed martial arts (MMA) patron, mi-awhag sa tanan nga mosalmot sa usa ka bulan nilang programa tungod daghang mga benespisyo ug kaayuhan nga makuha gikan sa martial arts.
Apil na niini ang benepisyo sa mental ug pisikal nga aspeto sa usa ka indibidwal gawas nga makat-on pa sila og self-defense nga gamit kaayo kon sila mabutang sa peligro nga sitwasyon.
Labaw sa tanan, si Master Ekin naghatag og oportunidad sa mga kickboxers ug MMA fighters nga mabaid og samot ang ilang abilidad.
Gawas sa MMA ug Muay Thai/kickboxing, ang Yaw-Yan Ardigma nagtanyag pa og ubang mga kurso sama sa arnis/eskrima, boxing fitness, ug Yaw-Yan combat (practical self-defense). Alang sa dugang detalye, mahimong mokontak sa 0969-6060002.
- Latest
