Managsoong Abne gipahalipayan sa Manticao LGU
CEBU, Philippines — Ang bag-ohay pang gikoronahan nga OPBF Silver flyweight champion nga si April Jay "Astroboy" Abne ug ang iyang mga igsoon nga sila si Ian Paul ug Augusto mibulsa og kinatibuk-ang P35,000 nga insentibo gikan sa lokal nga kagamhanan sa Manticao didto sa Misamis Oriental tungod sa pagdala nila og garbo ug dungog sa ilang lungsod sa natad sa boksing.
Si April Jay gihatagan og P15,000 samtang ang mga manghud niyang sila si Ian Paul ug Augusto gitunolan og P10,000 matag usa. Nadawat nila ang ilang bonus sa dihang mi-courtesy call sila ni Manticao Mayor Antonio "Tony" H. Baculio ning bag-ohay pa lamang.
"Mapasalamaton kaayo mi sa mainit nga suporta nga among nadawat gikan sa among mga kababayan ilabi na ni mayor Tony Baculio," matud pa ni April Jay Abne. "Seguradong makapadasig ni namo nga maningkamot pa og maayo aron makab-ot ang among mga damgo sa umaabot."
Ang mga Abne lab-as pang mihaw-as gikan sa malampusong kampanya sa "Engkwentro Dos" nga pasundayag sa ARQ Promotions niadtong Oktubre 30 didto sa Ibabao-Estancia Gym sa dakbayan sa Mandaue City.
Si Abne mipatibabaw pinaagi sa split decision batok sa beteranong si Bienvenido "Fairtex Ben Sniper" Ligas sa Elorde Stable aron sakmiton ang OPBF Silver 112-pound belt
Gawas nga giinat ang perpektong niyang record ngadto sa 7-0 uban ang 3KOs, si Abne mikulit sab sa iyang pangan sa bato isip labing unang kampiyon sa ARQ Boxing, nga gitukod sayo ning tuiga sa managtiayong Jason ug Eva Mari Arquisola aron paghatag og paglaum ug ingon man kapanginabuhian sa komunidad sa boksing taliwala ning pandemiya.
Si Ian Paul, nga gibansagan og “The Baby Assassin”, mipatigbabaw pinaagi sa unanimous decision batok ni Christopher Caburog sa Big Yellow Stable, samtang si Augusto nanginahanglan lamang og 74 ka segundos aron palukapahon ni Marvin Campo sa dalaygon niyang pro debut.
- Latest
