Isabelo, Ranido bag-ong sakop sa UV lancers

CEBU, Philippines — Nawad-an man tuod ang University of the Visayas  (UV) og duha ka All-Star players nga sila si Jancork Cabahug ug Gabriel Cometa, apan duna gihapoy kahayag nga midan-ag sa Green Lancers human ilang nakuha ang duha ka talentadong point guards nga sila si Christopher Erick L. Isabelo ug Jerick Jan 'JJ' Ranido aron mopalig-on sa ilang puwersa sa Cebu Schools Athletic Foundation, Inc. (CESAFI) basketball season sunod tuig.

Ang haw-ang nga gibiyaan nilang Cabahug nga mibalhin sa University of the Philippines (UP) Fighting Maroons sa UAAP ug Cometa nga mitapon sa San Beda Red Lions sa NCAA, dako kaayo nga tapakan, apan ang pag-abot nilang Isabelo ug Ranido tataw nga dakong gamit alang sa Lancers.

"Actually naa na kana si Isabelo sa line-up. Last sem pa na siya nag-practice sa team. In fact nakadula na kana sa among nga exhibition games (sa wala pa ang pandemya)," matud pa ni Lancers head coach Gary Cortes.

Si Cortes nga migiya sa Lancers ngadto sa lima ka sagunson nga pagtaak sa finals nga iyang gipalamanan og talagsaong grandslam niadtong 2016 ngadto sa 2018, taas og paglaum nilang Isabelo ug Ranido nga maoy mga sinaligan nga guwardiya sa dihang nagduwa pa sila sa high school uban sa  University of Southern Philippines Foundation (USPF) Baby Panthers ug University of Cebu (UC) Junior Webmasters.

"Kani sila si Ranido ug Isabelo, mga deadly shooters. Dugay nako naka -appreciate sa ilang dinulaan. Bisag sa ilang pangedaron, matured na og dinulaan and most of all, mga team player ni sila," dugang pa ni Cortes.

Sa ilang bahin, sila si Isabelo ug Ranido parehong andam nga moatubang sa dakong hagit nga nag-atang kanila sa unahan isip mga sakop sa dekalibreng Lancers.

"UV Lancers akong gipili kay it was a family choice and kasagaran namo kaliwat kay gikan gyud sa UV. Dugay na sad ko gikuha sa UV adtong high school pa unta, matud pa ni Isabelo nga kanunay sakop sa All-Star sa dihang team captain pa siya sa Baby Panthers.

Sukwahi sa ubang players nga nangindahay sa Manila, ang 5-foot-9 nga si Ranido nakahukom nga magpabilin sa CESAFI ning higayona sul-ot ang uniporma sa Lancers.

"Naka-decide ko nga magpabilin sa CESAFI kay gusto nako matuman nako akong pangandoy diri sa Cebu,"  sumala pa ni Ranido nga namiyembro sa Mythical 5 ug gibayaw nga Finals MVP sa dihang nakampiyon ang UC sa CESAFI juniors basketball duha ka tuig ang milabay.

"Gipili nako ang UV kay aron madugangan pa ang akong kahibalo sa pagdula sa basketbol."