Crawford moaway sa Septiyembre; Pacquiao posibleng kontra

CEBU, Philippines — Nagpaabot si Top Rank promoter Bob Arum nga si WBO welterweight champion Terence Crawford moaway og balik karong Septiyembre og Oktubre.

Si Arum nanghinaut nga nianang higayona tugotan na ang mga fans nga makatan-aw sa away sud sa binyu nga sa pagka karon gidili pa gumikan sa nagpadayong pagsaka sa kaso sa Covid-19.

Midugang si Arum nga iyang gisaytan aron posibleng makontra ni Crawford mao sila si Manny Pacquiao, Kell Brook, Yordenis Ugas ug Shawn Porter.

Apan nilang upat, ang 41-anyos nga si Pacquiao (62-7-2, 39KOs) maoy makahatag sa labing eksplosibong away ni Crawford (36-0, 27KOs) nga seguradong atngan sa tanang mga disipulo sa boksing.

Sa miagi niyang away dul-an sa usa ka tuig na ang milabay, gipukan ni Pacquiao ang kanhi wa'y pildeng si Keith Thurman aron angkunon ang WBA 'Super' welterweight title.

Wala pa hinuo'y kasiguroan ang plano ni Arum kay sa sayo pa si Pacquiao miingon nga wala na siya'y plano pang moaway karong tuiga kay adto niya ibubo ang iyang enerhiya pagtabang sa mga kababayan niyang nanginahanglan ning panahon sa krisis panglawas.